الرقيب الدولي -
بعث الشاب علي حسين الخمايسة وهو من ذوي الاحتياجات الخاصة برسالة الى كافة المسؤولين في الدولة الاردنية تضمنت قصته ومعاناته وكيفية تفوقه في دراسته وقدرته على تجاوز الصعوبات التي واجهة مسيرة دراسته، الا انه لا يزال في صفوف العاطلين عن العمل.
وتاليا نص ما نشره الشاب الخمايسه:
نجحت توجيهي بمعدل ٩٢٪ وكنت الأول على لواء الكورة تخصص إدارة معلوماتية (ذكور) وبوقت كان الذنيبات وزير التربية يعني اللي بنجح مجرد نجاح بكون أبو زيد خاله ونجحنا ٣ من أصل ٥٦ طالب بالمدرسة من نفس التخصص.
وبتاريخ: ٢٠١٧/٩/١٢ تخرجت بكالوريوس إرشاد نفسي وكنت الأول عالقسم (وطبعاً كان كل هاذ ب٣ سنين)
وبتاريخ: ٢٠١٩/٦/١٨ تخرجت ماجستير إرشاد نفسي برضه وكنت مسار رساله (لجنة المناقشة حكتلي رسالتك عن رسالتين ومفيده جداً وكانت التعديلات بسيطة جداً) وتخرجت بتقدير جيد جداً (والماستر كان بس بسنتين).
وسمو ولي العهد خرجنا بالماستر وثاني يوم رنلي مكتبه وحكولي انه مهتم شخصياً بوظيفتي بس لاقيلنا شاغر، لقيت شاغر بجامعة اليرموك ورفعنا الكتاب من الجامعة لمكتب سموّه ولي شهرين ونص بس بستنى حدا يحكيلي كلمه حتى لو انه خلص بطلنا.
شو ضل في شغلات أعملها حتى أحصل على حق شرعي بصفة مواطن أردني؟؟
شو ضل لازم أعمل بعمري اللي لسا ما صار ٢٣ سنه حتى أكون مؤهل للوظيفه؟؟
شو لازم أعمل كمان حتى أحصل على ابتعاث أو منحة دكتوراة؟!
شو لازم أعمل كمان حتى ما أخلي واحد تخرج تقديره مقبول يحكيلي نفعك انك تخرجت الاول لا وكملت ماستر ؟؟
شو لازم أعمل حتى أحافظ على طموحي وحلمي وما يصيبني الإحباط واليأس؟
شو لازم أعمل حتى يضل عندي طموح بالدكتوراة؟
مش قاعد بحكي هالقصص لانه مثل ما بحكي الأغلب ذوي احتياجات خاصة (وما بنفذ طبعاً) .
لا بطالب بحقي كـمواطن تعب وسبق جيله بكثير وحقه انه يلاقي تقدير لتعبه مش يروح هيك ويندم على اليوم اللي حلم وطمح فيه بهالبلد.
أنا ما درست وطمحت أكون دكتور بس مشان وظيفة وراتب ، دائماً بحكيها أنا طموحي أكون شخص مؤثر بالناس بشكل إيجابي وأكون مصدر أمل وقوّه الهم ،بس والله الواحد اذا ما بلاقي تقدير لتعبه بنطفي لا إرادي ، القعده بتخلي اليأس يعشعش بقلب وعقل الإنسان مهما كان هدفه وقوته .
وبالنهاية{ حَسْبُنَا اللَّهُ سَيُؤْتِينَا اللَّهُ مِن فَضْلِهِ وَرَسُولُهُ إِنَّا إِلَى اللَّهِ رَاغِبُونَ }.